កំពង់ស្ពឺ៖ សមាជិកសភាវ័យក្មេងលោក ហ៊ុន ម៉ានី បានធ្វើដំណើរទៅកាន់ឃុំស្គុះ និងឃុំក្រាំងអំពិល ស្រុកសំរោងទង ខេត្តកំពង់ស្ពឺ កាលពីថ្ងៃសុក្រ ទី២៧ ខែឧសភា នឹងថាអ្វីដែលលោកកត់សម្គាល់ទឹកមុខពោរពេញដោយក្តីស្រលាញ់ និងការរាប់អានពីពលរដ្ឋចំពោះលោកដែលលោកថានេះជាអ្វីដែលគណបក្សប្រជាជនខិតខំប្រឹងប្រែងដើម្បីផ្ដល់ទៅពលរដ្ឋ។

លោក ហ៊ុន ម៉ានី បានសរសេរលើហ្វេសបុកផេករបស់លោកកាលពីថ្ងៃទី២៧ ខែឧសភាថា គណបក្សប្រជាជនបាននៅរួមសុខទុក្ខជាមួយពលរដ្ឋ ហើយមានទាំងសមត្ថភាពក្នុងការការពារអាយុជីវិត ធានាជីវភាពប្រចាំថ្ងៃរបស់ប្រជាពលរដ្ឋកសាងសមិទ្ធផល វឌ្ឍភាពពិតប្រាកដ និងគិតគូរបន្តដល់អនាគតរបស់អ្នកជំនាន់ក្រោយ។

លោកថា៖ «លទ្ធផលជាតឹកតាងបញ្ជាក់ពីកិច្ចខិតខំប្រឹងប្រែង និងសមត្ថភាពរបស់គណបក្សប្រជាជនកម្ពុជា គឺក្តីសុខ និងស្នាមញញឹមរបស់ប្រជាពលរដ្ឋ។ បើនិយាយបែបសាមញ្ញ គឺថាគណបក្សប្រជាជនកម្ពុជាមានសមត្ថភាពពេញលេញក្នុងការសម្រេចនូវលទ្ធផល និងសមិទ្ធផលនានាដែលបម្រើប្រយោជន៍ជូនប្រជាពលរដ្ឋក្នុងមូលដ្ឋានពិតប្រាកដ»។

លោកបានស្នើដល់ពលរដ្ឋបន្តបោះឆ្នោតឲ្យគណបក្សប្រជាជនបន្តថែមទៀត។

គណបក្សប្រជាជនកម្ពុជាត្រូវបានបង្កើតឡើងនៅ ថ្ងៃទី២៨ ខែមិថុនា ឆ្នាំ១៩៥១ ដោយអ្នកជាតិនិយមកម្ពុជាដើម្បីរំដោះជាតិកម្ពុជាពីអាណានិគមបារាំង។ គឺជាគណបក្សដែលចំណាស់ជាងគេនៅ កម្ពុជា ហើយបានដឹកនាំការតស៊ូរំដោះប្រជាជនកម្ពុជាពីរបបខ្មែរក្រហមនៅ ឆ្នាំ១៩៧៩។

បច្ចុប្បន្នគណបក្សនេះដឹកនាំដោយសម្ដេចតេជោ ហ៊ុន សែន ជាប្រធាន និងមានអនុប្រធាន ៤រូបគឺសម្ដេចក្រឡាហោម ស ខេង និងសម្ដេចវិបុលសេនា សាយ ឈុំ សម្ដេចពិជ័យសេនា ទៀ បាញ់ និងលោកស្រី ម៉ែន សំអន ហើយសម្ដេចពញាចក្រី ហេង សំរិន ជាប្រធានកិត្តិយស៕